CAT 2026 ನೋಂದಣಿಗೆ ಇನ್ನು 48 ಗಂಟೆ ಮಾತ್ರ ಬಾಕಿ! ತಪ್ಪುಗಳಾಗದಂತೆ ಅರ್ಜಿ ಸಲ್ಲಿಸಲು ಈ ಚೆಕ್‌ಲಿಸ್ಟ್ ಫಾಲೋ ಮಾಡಿ

CAT 2026 ನೋಂದಣಿಗೆ ಸೆಪ್ಟೆಂಬರ್ 22, 2026ರ ಸಂಜೆ 5 ಗಂಟೆಯವರೆಗೆ ಮಾತ್ರ ಅವಕಾಶವಿದೆ. ನೀವು ಇಲ್ಲಿಯವರೆಗೆ ಅರ್ಜಿ ಸಲ್ಲಿಸದಿದ್ದರೆ, ಈ ಕೊನೆಯ 48 ಗಂಟೆಗಳಲ್ಲಿ ಏನು ಮಾಡಬೇಕು ಎಂಬ ಪ್ಲಾನ್ ಇಲ್ಲಿದೆ. ಮೊದಲ ಬಾರಿಗೆ ಪರೀಕ್ಷೆ ಬರೆಯುತ್ತಿರುವವರು, ಅಂತಿಮ ವರ್ಷದ ವಿದ್ಯಾರ್ಥಿಗಳು ಮತ್ತು 2027ರ ಪ್ರವೇಶಾತಿಯನ್ನು ಗುರಿಯಾಗಿಸಿಕೊಂಡಿರುವವರು ತಕ್ಷಣವೇ ಎಚ್ಚೆತ್ತುಕೊಳ್ಳಿ. ಕೊನೆಯ ಕ್ಷಣದ ತಾಂತ್ರಿಕ ತೊಂದರೆಗಳು, ಪಾವತಿ ಸಮಸ್ಯೆಗಳನ್ನು ಬಗೆಹರಿಸಲು ಮತ್ತು ಈ 2 ದಿನಗಳ ಸಿದ್ಧತೆಗಾಗಿ ನಮ್ಮ ಚೆಕ್‌ಲಿಸ್ಟ್ ಹಾಗೂ ಸಲಹೆಗಳನ್ನು ಬಳಸಿಕೊಳ್ಳಿ. ಡೆಡ್‌ಲೈನ್‌ ಹತ್ತಿರವಾಗುತ್ತಿದ್ದಂತೆ ವೆಬ್‌ಸೈಟ್‌ ಟ್ರಾಫಿಕ್ ಹೆಚ್ಚಾಗಿ ಸರ್ವರ್ ಮಂದಗತಿಯಲ್ಲಿ ಸಾಗಬಹುದು, ಹಾಗಾಗಿ ತಡಮಾಡದೆ ಈಗಲೇ ಪ್ರಕ್ರಿಯೆ ಪೂರ್ಣಗೊಳಿಸಿ.

ಲಾಗಿನ್ ಆಗುವ ಮೊದಲು ಈ ದಾಖಲೆಗಳನ್ನು ಸಿದ್ಧವಾಗಿಟ್ಟುಕೊಳ್ಳಿ: ಸರ್ಕಾರಿ ಗುರುತಿನ ಚೀಟಿ, 10 ಮತ್ತು 12ನೇ ತರಗತಿಯ ಅಂಕಪಟ್ಟಿಗಳು, ಪದವಿ ಪ್ರಮಾಣಪತ್ರ ಮತ್ತು ಕೆಲಸದ ಅನುಭವದ ಪತ್ರಗಳು. ಕ್ಯಾಟಗರಿ, ಆರ್ಥಿಕವಾಗಿ ಹಿಂದುಳಿದ ವರ್ಗ (EWS) ಅಥವಾ ವಿಕಲಚೇತನ ಪ್ರಮಾಣಪತ್ರಗಳು ಅಧಿಕೃತ ನಮೂನೆಯಲ್ಲಿರಬೇಕು. OBC-NCL ಮತ್ತು EWS ಪ್ರಮಾಣಪತ್ರಗಳು ಏಪ್ರಿಲ್ 1, 2026 ಅಥವಾ ಆ ನಂತರ ನೀಡಿದ್ದಾಗಿರಬೇಕು. ಪೋರ್ಟಲ್ ಸೂಚನೆಗೆ ಅನುಗುಣವಾಗಿ ಇತ್ತೀಚಿನ ಪಾಸ್‌ಪೋರ್ಟ್ ಅಳತೆಯ ಫೋಟೋ ಮತ್ತು ಸಹಿಯನ್ನು JPEG ಮಾದರಿಯಲ್ಲಿ ಸಿದ್ಧವಾಗಿಟ್ಟುಕೊಳ್ಳಿ. ಪಾವತಿಯಲ್ಲಿ ಯಾವುದೇ ತೊಂದರೆ ಆಗದಿರಲು UPI, ಕಾರ್ಡ್ ಅಥವಾ ನೆಟ್‌ಬ್ಯಾಂಕಿಂಗ್ ವ್ಯವಸ್ಥೆ ರೆಡಿ ಇರಲಿ.

CAT 2026 ನೋಂದಣಿ: ದಾಖಲೆಗಳ ಚೆಕ್‌ಲಿಸ್ಟ್ ಮತ್ತು ಅಪ್‌ಲೋಡ್ ನಿಯಮಗಳು

ನಿಮ್ಮ ಅರ್ಜಿ ತಿರಸ್ಕೃತಗೊಳ್ಳಬಾರದು ಎಂದರೆ ಫೋಟೋ ಮತ್ತು ಸಹಿ ಅಪ್‌ಲೋಡ್ ಮಾಡುವಾಗ ಈ ನಿಯಮಗಳನ್ನು ಕಡ್ಡಾಯವಾಗಿ ಪಾಲಿಸಿ. ಫೋಟೋ: JPEG ಮಾದರಿಯಲ್ಲಿರಬೇಕು, ಗರಿಷ್ಠ 80 KB ಗಾತ್ರ, 1200×1200 ಪಿಕ್ಸೆಲ್ ಚೌಕಾಕಾರದ ಫ್ರೇಮ್ ಹಾಗೂ ತಿಳಿ ಬಣ್ಣದ ಹಿನ್ನೆಲೆಯೊಂದಿಗೆ ಮುಖ ಸ್ಪಷ್ಟವಾಗಿ ಕಾಣಿಸಬೇಕು. ಸಹಿ: JPEG ಮಾದರಿಯಲ್ಲಿ 80 KB ಒಳಗೆ, ಬಿಳಿ ಹಾಳೆಯ ಮೇಲೆ ಕಪ್ಪು ಶಾಯಿಯಲ್ಲಿ ಸಹಿ ಮಾಡಿರಬೇಕು. ಕ್ಯಾಟಗರಿ ಪ್ರಮಾಣಪತ್ರಗಳನ್ನು ವೆಬ್‌ಸೈಟ್‌ನಲ್ಲಿರುವ ಅಧಿಕೃತ ಮಾದರಿಯಲ್ಲೇ ಅಪ್‌ಲೋಡ್ ಮಾಡಿ. ಒಂದು ವೇಳೆ ನಿಮ್ಮ OBC-NCL ಅಥವಾ EWS ಪ್ರಮಾಣಪತ್ರ ಇನ್ನೂ ಕೈಸೇರದಿದ್ದರೆ, ಹಿಂದಿನ ಬಾರಿಯ ಅಂಡರ್‌ಟೇಕಿಂಗ್ ನಿಯಮಗಳನ್ನು ಪರಿಶೀಲಿಸಿ.

CAT 2026 ನೋಂದಣಿ: ಪಾವತಿ, ಸರ್ವರ್ ಸಮಸ್ಯೆಗೆ ಪರಿಹಾರ ಮತ್ತು ಎಡಿಟ್ ವಿಂಡೋ ವಿವರಗಳು

ಸರ್ವರ್ ಬ್ಯುಸಿ ಇರದ ಸಮಯ (off-peak hours) ನೋಡಿಕೊಂಡು ಶುಲ್ಕ ಪಾವತಿಸಿ. ಪಾವತಿ ಪ್ರಕ್ರಿಯೆ ನಡೆಯುವಾಗ ಪೇಜ್ ರಿಫ್ರೆಶ್ ಮಾಡಬೇಡಿ. ಖಾತೆಯಿಂದ ಹಣ ಕಡಿತಗೊಂಡು ಸ್ಟೇಟಸ್ 'ಫೇಲ್ಡ್' ಎಂದು ತೋರಿಸಿದರೆ, ಸ್ವಲ್ಪ ಸಮಯ ಕಾಯ್ದು ಪೇಮೆಂಟ್ ಹಿಸ್ಟರಿ ಚೆಕ್ ಮಾಡಿ. ವಿಫಲವಾದ ಪಾವತಿಗಳನ್ನು ಬ್ಯಾಂಕ್‌ಗಳು ತಾವಾಗಿಯೇ ವಾಪಸ್ (Auto-reverse) ಜಮಾ ಮಾಡುತ್ತವೆ; ಹಾಗಾಗಿ ಖಚಿತಪಡಿಸಿಕೊಂಡ ನಂತರವೇ ಮತ್ತೆ ಪ್ರಯತ್ನಿಸಿ. ಸುರಕ್ಷತೆಗಾಗಿ ಟ್ರಾನ್ಸ್‌ಆಕ್ಷನ್ ಐಡಿ ಮತ್ತು ಸ್ಕ್ರೀನ್‌ಶಾಟ್‌ಗಳನ್ನು ತೆಗೆದಿಟ್ಟುಕೊಳ್ಳಿ. ಫೋಟೋ ಅಥವಾ ಸಣ್ಣಪುಟ್ಟ ತಪ್ಪುಗಳನ್ನು ತಿದ್ದುಪಡಿ ಮಾಡಲು ಶೀಘ್ರದಲ್ಲೇ ಕೊರೆಕ್ಷನ್ ವಿಂಡೋ ಓಪನ್ ಆಗಲಿದೆ. ಇದಕ್ಕಾಗಿ ವದಂತಿಗಳನ್ನು ನಂಬದೆ ಅಧಿಕೃತ ಪ್ರಕಟಣೆಗಳನ್ನು ಗಮನಿಸುತ್ತಿರಿ.

CAT 2026: ಕೊನೆಯ 48 ಗಂಟೆಗಳ ರಿವಿಷನ್ ಮತ್ತು ಮಾಕ್ ಟೆಸ್ಟ್ ಸ್ಟ್ರಾಟಜಿ

ದಿನಕ್ಕೆ ಒಂದರಂತೆ ಸಮಯ ನಿಗದಿಪಡಿಸಿ ಮಾಕ್ ಟೆಸ್ಟ್ ಬರೆಯಿರಿ ಮತ್ತು ಮುಖ್ಯ ತಪ್ಪುಗಳನ್ನು ವಿಶ್ಲೇಷಿಸಿ. ಕ್ವಾಂಟಿಟೇಟಿವ್ ವಿಭಾಗದಲ್ಲಿ ಸ್ಪೀಡ್ ಹೆಚ್ಚಿಸುವ ಲೆಕ್ಕಗಳನ್ನು ಪ್ರಾಕ್ಟೀಸ್ ಮಾಡಿ. ಡೇಟಾ ಇಂಟರ್‌ಪ್ರಿಟೇಷನ್ ಮತ್ತು ಲಾಜಿಕಲ್ ರೀಸನಿಂಗ್ (DILR) ವಿಭಾಗಕ್ಕೆ ಎರಡು ಮಧ್ಯಮ ಮಟ್ಟದ ಸೆಟ್‌ಗಳನ್ನು ಬಿಡಿಸಿ. ಶಬ್ದಕೋಶ ಮತ್ತು ಟೋನ್ ಸುಧಾರಿಸಿಕೊಳ್ಳಲು ದಿನಕ್ಕೆ ಕನಿಷ್ಠ ಎರಡು ಸಂಪಾದಕೀಯಗಳನ್ನು ಓದಿ. ಪರೀಕ್ಷಾ ಕೇಂದ್ರಕ್ಕೆ ಒಯ್ಯಬೇಕಾದ ದಾಖಲೆಗಳು ಮತ್ತು ಪ್ರವೇಶ ಪತ್ರದ ನಿಯಮಗಳ ಪ್ರಿಂಟ್‌ಔಟ್ ತಗೆದಿಟ್ಟುಕೊಳ್ಳಿ. ಯಾವುದೇ ನೆರವಿಗೆ ಅಧಿಕೃತ ಪೋರ್ಟಲ್‌ನ ಹೆಲ್ಪ್‌ಡೆಸ್ಕ್ ಸಂಪರ್ಕಿಸಿ ಮತ್ತು ವೈಯಕ್ತಿಕ ವಿವರ ಹಂಚಿಕೊಳ್ಳುವ ಮುನ್ನ ಅಧಿಕೃತ ವೆಬ್‌ಸೈಟ್ ಯುಆರ್‌ಎಲ್ (URL) ಅನ್ನೇ ಬಳಸುತ್ತಿದ್ದೀರಾ ಎಂದು ಖಚಿತಪಡಿಸಿಕೊಳ್ಳಿ.