ಕೇಂದ್ರೀಯ ಪ್ರೌಢ ಶಿಕ್ಷಣ ಮಂಡಳಿಯ 10ನೇ ತರಗತಿ ಟರ್ಮ್ 2 ಪರೀಕ್ಷೆಗಳು ಈಗಾಗಲೆ ಆರಂಭಗೊಂಡಿದ್ದು, ವಿಜ್ಞಾನ ವಿಷಯ ಪರೀಕ್ಷೆಯು ನಾಳೆ ನಡೆಯಲಿದೆ. ಪರೀಕ್ಷೆಗೆ ಹಾಜರಾಗಲಿರುವ ವಿದ್ಯಾರ್ಥಿಗಳು ಪರೀಕ್ಷಾ ಮಾದರಿ ಜೊತೆಗೆ ಮಾರ್ಗಸೂಚಿಗಳನ್ನು ಓದಿಕೊಳ್ಳಿ.
ಸಿಬಿಎಸ್ಇ ಮಾದರಿ ಪತ್ರಿಕೆ ಪ್ರಕಾರ ವಿಜ್ಞಾನ ಪರೀಕ್ಷೆಯು ಎರಡು ಗಂಟೆಗಳ ಕಾಲ ಅಂದರೆ ಬೆಳಿಗ್ಗೆ 10:30 ರಿಂದ ಮಧ್ಯಾಹ್ನ 12:30 ರವರೆಗೆ ನಡೆಯಲಿದೆ. ಪ್ರವೇಶ ಪತ್ರದಲ್ಲಿ ವಿವರಿಸಿರುವಂತೆ ವಿದ್ಯಾರ್ಥಿಗಳು ಪರೀಕ್ಷಾ ಕೇಂದ್ರಕ್ಕೆ ಅರ್ಧ ಘಂಟೆ ಮುಂಚಿತವಾಗಿ ತಲುಪಬೇಕಿರುತ್ತದೆ.
ಸಿಬಿಎಸ್ಇ ಟರ್ಮ್ 2 ಪರೀಕ್ಷೆಗೆ ಹಾಜರಾಗುವ ಅಭ್ಯರ್ಥಿಗಳು ತಮ್ಮ ಪ್ರವೇಶ ಪತ್ರ, ಪಾರದರ್ಶಕ ನೀರಿನ ಬಾಟಲಿ, ಸ್ಯಾನಿಟೈಸರ್ ಅನ್ನು ತೆಗೆದುಕೊಂಡು ಹೋಗಬೇಕಿರುತ್ತದೆ.
ಪರೀಕ್ಷೆಯ ಮಾರ್ಗಸೂಚಿಗಳ ಪ್ರಕಾರ ವಿದ್ಯಾರ್ಥಿಗಳು ಪರೀಕ್ಷಾ ಕೇಂದ್ರದಲ್ಲಿ ಮಾಸ್ಕ್ ಅನ್ನು ಕಡ್ಡಾಯವಾಗಿ ಹಾಕಬೇಕು ಮತ್ತು ಸಾಮಾಜಿಕ ಅಂತರವನ್ನು ಕಾಯ್ದುಕೊಳ್ಳಬೇಕು.
ಸಿಬಿಎಸ್ಇ ಟರ್ಮ್ 2 ವಿಜ್ಞಾನ ಪರೀಕ್ಷೆಯ ಮಾದರಿ :
* ಸಿಬಿಎಸ್ಇ ಟರ್ಮ್ 2 ವಿಜ್ಞಾನ ಪ್ರಶ್ನೆ ಪತ್ರಿಕೆಯು ಮೂರು ವಿಭಾಗಗಳು ಮತ್ತು 15 ಪ್ರಶ್ನೆಗಳನ್ನು ಒಳಗೊಂಡಿರುತ್ತದೆ.
* ವಿಭಾಗ ಎ ನಲ್ಲಿ ತಲಾ ಎರಡು ಅಂಕಗಳ ಏಳು ಪ್ರಶ್ನೆಗಳಿರುತ್ತವೆ.
* ವಿಭಾಗ ಬಿ ನಲ್ಲಿ ತಲಾ ಮೂರು ಅಂಕಗಳ ಆರು ಪ್ರಶ್ನೆಗಳಿರುತ್ತವೆ.
* ವಿಭಾಗ ಸಿ ನಲ್ಲಿ ತಲಾ ನಾಲ್ಕು ಅಂಕಗಳ ಎರಡು ಕೇಸ್ ಆಧಾರಿತ ಪ್ರಶ್ನೆಗಳಿರುತ್ತವೆ.
* ಎಲ್ಲಾ ಪ್ರಶ್ನೆಗಳನ್ನು ಕಡ್ಡಾಯವಾಗಿ ಉತ್ತರಿಸಬೇಕಿರುತ್ತದೆ.
* ಆಂತರಿಕ ಆಯ್ಕೆಗಳನ್ನು ಸಹ ಒದಗಿಸಲಾಗಿದೆ ಮತ್ತು ವಿದ್ಯಾರ್ಥಿಗಳು ಅಂತಹ ಪ್ರಶ್ನೆಗಳಿಗೆ ಪರ್ಯಾಯ ಪ್ರಶ್ನೆಗಳಲ್ಲಿ ಒಂದನ್ನು ಮಾತ್ರ ಉತ್ತರಿಸಬಹುದು.