ಮಕ್ಕಳ ದಿನಾಚರಣೆಯ ಸಂಭ್ರಮದಲ್ಲಿ ಇದೀಗ ಗೂಗಲ್ ಸರ್ಚ್ ಇಂಜಿನ್. ಹೌದು ಇಂದು ದೇಶದೆಲ್ಲೆಡೆ ಮಕ್ಕಳ ದಿನಾಚರಣೆ ಆಚರಿಸಲಾಗುತ್ತಿದೆ. ಈ ಹಿನ್ನೆಲೆ ಮಕ್ಕಳ ದಿನಾಚರಣೆಗೆ ಸಂಬಂಧಪಟ್ಟಂತೆ ವಿಶೇಷವಾಗಿ ಪರಿಸರದ ಕಾಳಜಿಯುಳ್ಳ ಡೂಡಲ್ ಅನ್ನು ನೀವು ನೋಡಬಹುದಾಗಿದೆ.
ಪ್ರತೀ ವರ್ಷ ನವಂಬರ್ 14 ರಂದು ಮಕ್ಕಳ ದಿನಾಚರಣೆ ಆಚರಿಸಲಾಗುತ್ತದೆ. ದೇಶದ ಮೊದಲ ಪ್ರಧಾನಿ ಜವಹರ್ ಲಾಲ್ ನೆಹರೂ ಅವರ ಜನ್ಮದಿನದ ಸವಿನೆನಪಿಗಾಗಿ ಈ ಮಕ್ಕಳ ದಿನಾಚರಣೆಯನ್ನ ಆಚರಿಸಲಾಗುತ್ತದೆ.
ನವಂಬರ್ 14 ರಂದು ಜನಿಸಿರುವ ದೇಶದ ಮೊದಲ ಪ್ರಧಾನಿ ನೆಹರೂ ಅವರಿಗೆ ಮಕ್ಕಳೆಂದ್ರೆ ಅಚ್ಚುಮೆಚ್ಚು. ಹಾಗಾಗಿ ತಮ್ಮ ಜನ್ಮ ದಿನವನ್ನ ಮಕ್ಕಳ ದಿನಾಚರಣೆಯನ್ನಾಗಿ ಆಚರಿಸುವಂತೆ ಕರೆ ನೀಡಿದ್ದರು ನೆಹರೂ. ಈ ದಿನವನ್ನ ಹಿಂದಿಯಲ್ಲಿ ಬಾಲ್ ದಿವಸ್ ಎಂದು ಕರೆಯುತ್ತಾರೆ.
ಇನ್ನು ಈ ಬಾರಿಯ ಡೂಡಲ್ ಡಿಸೈನ್ ಬಗ್ಗೆ ಹೇಳುವುದಾದ್ರೆ ಗುರಗಾಂನ ದೆಹಲಿ ಪಬ್ಲಿಕ್ ಶಾಲೆಯ ವಿದ್ಯಾರ್ಥಿ ದಿವ್ಯಾಂಶಿ ಈ ಡೂಡಲ್ ಅನ್ನು ರಚಿಸಿದ್ದಾರೆ. ನವಂಬರ್ 14 ಮಕ್ಕಳ ದಿನಾಚರಣೆ ಪ್ರಯುಕ್ತ "ನಾನು ದೊಡ್ಡವಳಾಗಿ ಬೆಳೆದ ಸಮಯಕ್ಕೆ, ಮರಗಳು ನಡೆಯಬಹುದು ಅಥವಾ ಹಾರಬಲ್ಲವು ಎಂದು ನಾನು ಭಾವಿಸುತ್ತೇನೆ. ಇದರಿಂದ ಮಾನವರು ಮರಗಳನ್ನು ಒಂದೆಡೆಯಿಂದ ಇನ್ನೊಂದೆಗೆ ಸಾಗಿಸಲು ಸುಲಭವಾಗುವುದು. ಅಗತ್ಯವಿದ್ದರೆ ಮರಗಳಿಗೆ ತಮ್ಮ ಸ್ನೇಹಿತರ ಜೊತೆ ಇನ್ನೊಂದು ಕಡೆಗೆ ಚಲಿಸಲು ಹೇಳಬಹುದು. ಹಾಗೆಯೇ ಆಮ್ಲಜನಕ ಉತ್ಪಾದಕಗಳು ಒಂದೆಡೆಯಿಂದ ಇನ್ನೊಂದೆಡೆಗೆ ಚಲಿಸಲು ಸಾಧ್ಯವಾದೀತು. ಇದರಿಂದ ಪರಿಸರ ನಾಶ ಕಡಿಮೆಯಾಗುತ್ತದೆ. ಇದರಿಂದ ಹೊಸ ಯುಗದ ಆರಂಭವಾಗಲಿದೆ "ಎಂದು ದಿವ್ಯಾಂಶಿ ಬರೆದಿದ್ದಾರೆ.
ಈ ಭಾರಿ ಡೂಡಲ್ ಫಾರ್ ಗೂಗಲ್ 2019ರ ಸ್ಪರ್ಧೆಯನ್ನ ದೇಶದಾದ್ಯಂತ ಆಯೋಜಿಸಲಾಗಿತ್ತು. ಈ ಸ್ಪರ್ಧೆಯಲ್ಲಿ ದೇಶದಾದ್ಯಂತ ಅಧಿಕ ಮಕ್ಕಳು ಭಾಗವಹಿಸಿದ್ದರು. ಈ ಮಕ್ಕಳನ್ನೆಲ್ಲಾ ಹಿಂದಿಕ್ಕಿ ವಿದ್ಯಾರ್ಥಿ ದಿವ್ಯಾಂಶಿ ಜಯಗಳಿಸಿದ್ದಾರೆ.
ವಿದ್ಯಾರ್ಥಿ ದಿವ್ಯಾಂಶಿ ಬಿಡಿಸಿರುವ ಡೂಡಲ್ ಪರಿಸರಕ್ಕೆ ಸಂಬಂಧಪಟ್ಟದ್ದಾಗಿದೆ. ಆಕಾಶ, ಬೆಟ್ಟ, ಮರಗಿಡಗಳು ಚಪ್ಪಲಿ ಹಾಕಿಕೊಂಡು ಒಂದೆಡೆಯಿಂದ ಇನ್ನೊಂದೆಡೆ ಚಲಿಸುತ್ತಿರುವ ದೃಶ್ಯಗಳನ್ನು ಕ್ರೆಯಾನ್ಸ್ನಲ್ಲಿ ಬಿಡಿಸಿ ಬಣ್ಣ ಹಚ್ಚಲಾಗಿದೆ. ಇನ್ನು ಮರ, ಸೈಕಲ್ ಮತ್ತು ಹಸಿರಿನ ಎಲೆಗಳಿಂದ ಗೂಗಲ್ ಪದಗಳನ್ನ ಚಿತ್ರಿಸಲಾಗಿದೆ. ಈ ಚಿತ್ರಕಲೆ ನಿಜಕ್ಕೂ ಆಕರ್ಷಕವಾಗಿದ್ದು, ಅಷ್ಟೇ ಅಲ್ಲದೇ ಸುಂದರವಾಗಿಯೂ ಇದೆ.