IBPS SO ಪ್ರಿಲಿಮ್ಸ್ ಪರೀಕ್ಷೆ: ನಾಳೆ ಪರೀಕ್ಷೆಗೆ ಹೋಗುವ ಮುನ್ನ ಈ ತಪ್ಪುಗಳನ್ನು ಮಾಡಬೇಡಿ!

IBPS ಸ್ಪೆಷಲಿಸ್ಟ್ ಆಫೀಸರ್ ಪ್ರಿಲಿಮ್ಸ್ ಪರೀಕ್ಷೆ ಶನಿವಾರ, 2026ರ ಆಗಸ್ಟ್ 29ರಂದು ನಡೆಯಲಿದೆ. ನೀವು ನಾಳೆ ಪರೀಕ್ಷೆಗೆ ಹಾಜರಾಗುತ್ತಿದ್ದರೆ, ಇಂದೇ ನಿಮ್ಮ ಎಲ್ಲಾ ತಯಾರಿಗಳನ್ನು ಮತ್ತೊಮ್ಮೆ ಚೆಕ್ ಮಾಡಿಕೊಳ್ಳಿ. ನಿಮ್ಮ ಕಾಲ್ ಲೆಟರ್ ಅನ್ನು ರೀಪ್ರಿಂಟ್ ತೆಗೆದುಕೊಂಡು, ಪರೀಕ್ಷಾ ಕೇಂದ್ರ ಮತ್ತು ಶಿಫ್ಟ್ ಸಮಯವನ್ನು ಕನ್ಫರ್ಮ್ ಮಾಡಿಕೊಳ್ಳಿ. ಅಭ್ಯರ್ಥಿಗಳ ಪೋರ್ಟಲ್ ಆಗಸ್ಟ್ 29ಕ್ಕೆ ಕ್ಲೋಸ್ ಆಗಲಿದೆ. ಐಬಿಪಿಎಸ್ ಕ್ಯಾಲೆಂಡರ್‌ನಲ್ಲೂ ಇದೇ ದಿನಾಂಕವನ್ನು ನೀಡಲಾಗಿದೆ. ಯಾವುದೇ ತಪ್ಪುಗಳಾಗದಂತೆ ತಡೆದು, ಉತ್ತಮ ಅಂಕ ಗಳಿಸಲು ಈ ಪ್ಲಾನ್ ಫಾಲೋ ಮಾಡಿ.

ರಾತ್ರಿ ಮಲಗುವ ಮುನ್ನ ನಿಮ್ಮ ದಾಖಲೆಗಳನ್ನು ಸಿದ್ಧವಾಗಿಟ್ಟುಕೊಳ್ಳಿ. ಎರಡು ಕಾಲ್ ಲೆಟರ್ ಪ್ರಿಂಟ್ ತೆಗೆದುಕೊಂಡು, ಅರ್ಜಿ ಸಲ್ಲಿಸುವಾಗ ಅಪ್‌ಲೋಡ್ ಮಾಡಿದ್ದ ಫೋಟೋವನ್ನೇ ಅದಕ್ಕೆ ಅಂಟಿಸಿ. ಜೊತೆಗೆ ಮತ್ತೊಂದು ಹೆಚ್ಚುವರಿ ಫೋಟೋ ಇಟ್ಟುಕೊಳ್ಳಿ. ಸರ್ಕಾರಿ ಮಾನ್ಯತೆ ಪಡೆದ ಮೂಲ ಐಡಿ ಕಾರ್ಡ್ ಹಾಗೂ ಅದರ ಒಂದು ಜೆರಾಕ್ಸ್ ಪ್ರತಿಯನ್ನು ಮರೆಯದೇ ತೆಗೆದುಕೊಂಡು ಹೋಗಿ. ಸ್ಕ್ರೈಬ್ ಬಳಸುವ PwBD ಅಭ್ಯರ್ಥಿಗಳು ಆನ್‌ಲೈನ್ ಡಿಕ್ಲೇರೇಶನ್‌ನ ಪ್ರಿಂಟ್‌ಔಟ್ ತರಬೇಕಾಗುತ್ತದೆ. ಪರೀಕ್ಷಾ ಹಾಲ್ ಪ್ರವೇಶಕ್ಕೆ ತೊಂದರೆಯಾಗದಂತೆ, ಎಲ್ಲಾ ದಾಖಲೆಗಳಲ್ಲೂ ನಿಮ್ಮ ಹೆಸರು ಒಂದೇ ರೀತಿ ಇದೆಯೇ ಎಂದು ಖಚಿತಪಡಿಸಿಕೊಳ್ಳಿ.

IBPS SO ಪ್ರಿಲಿಮ್ಸ್ ಅಡ್ಮಿಟ್ ಕಾರ್ಡ್ ನಿಯಮಗಳು ಮತ್ತು ರಿಪೋರ್ಟಿಂಗ್ ಸಮಯ

ಕಾಲ್ ಲೆಟರ್‌ನಲ್ಲಿ ನಮೂದಿಸಿರುವ ರಿಪೋರ್ಟಿಂಗ್ ಸಮಯಕ್ಕೆ ಸರಿಯಾಗಿ ಪರೀಕ್ಷಾ ಕೇಂದ್ರವನ್ನು ತಲುಪಿ, ತಡವಾಗಿ ಬಂದರೆ ಪ್ರವೇಶ ಇರುವುದಿಲ್ಲ. ಭದ್ರತಾ ತಪಾಸಣೆ ಮತ್ತು ಹೆಬ್ಬೆರಳಿನ ಬಯೋಮೆಟ್ರಿಕ್ ಹಾಗು ಫೋಟೋ ತೆಗೆಯಲು ಸಮಯ ತಗುಲುತ್ತದೆ. ಕೈಬೆರಳುಗಳಿಗೆ ಮೆಹಂದಿ ಅಥವಾ ಇಂಕ್ ಹಚ್ಚಿಕೊಳ್ಳಬೇಡಿ, ಇದರಿಂದ ಸ್ಕ್ಯಾನಿಂಗ್‌ನಲ್ಲಿ ಸಮಸ್ಯೆಯಾಗಬಹುದು. ಪರೀಕ್ಷೆಗೆ ಮುಂಚಿತವಾಗಿ ಈ ಪ್ರಕ್ರಿಯೆಗಳು ಇರುವುದರಿಂದ, ಅದಕ್ಕೆ ತಕ್ಕಂತೆ ಉಪಹಾರ ಹಾಗೂ ನೀರಿನ ವ್ಯವಸ್ಥೆ ಮಾಡಿಕೊಳ್ಳಿ.

IBPS SO ಪ್ರಿಲಿಮ್ಸ್: ಯಾವ ವಸ್ತುಗಳಿಗೆ ಅನುಮತಿ ಇದೆ? ಯಾವುದಕ್ಕೆ ಇಲ್ಲ?

ಐಬಿಪಿಎಸ್ ನೀಡಿರುವ ಸೂಚನೆಯಂತೆ ಎಲೆಕ್ಟ್ರಾನಿಕ್ ಸಾಧನಗಳು, ವಾಚ್, ಲೋಹದ ವಸ್ತುಗಳು, ಕಾಗದದ ಚೀಟಿಗಳು ಮತ್ತು ಬ್ಯಾಗ್‌ಗಳನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ. ಅಭ್ಯರ್ಥಿಗಳು ಪ್ರಿಂಟ್ ಮಾಡಿದ ಕಾಲ್ ಲೆಟರ್, ಮಾನ್ಯವಾದ ಐಡಿ ಪ್ರೂಫ್, ಹೆಚ್ಚುವರಿ ಫೋಟೋ ಹಾಗೂ ಅರ್ಹರಿದ್ದರೆ ಸ್ಕ್ರೈಬ್ ಡಿಕ್ಲರೇಶನ್ ಪ್ರಿಂಟ್‌ಔಟ್ ಕೊಂಡೊಯ್ಯಬೇಕು. ಪರೀಕ್ಷಾ ಹಾಲ್‌ನೊಳಗೆ ಪಾರದರ್ಶಕ (Transparent) ನೀರಿನ ಬಾಟಲಿಗೆ ಮಾತ್ರ ಅನುಮತಿ ಇರುತ್ತದೆ.

IBPS SO ಪ್ರಿಲಿಮ್ಸ್: ಕೊನೆಯ 12 ಗಂಟೆ ಮತ್ತು 60 ನಿಮಿಷದ ಪಕ್ಕಾ ಪ್ಲಾನ್

ಕೊನೆಯ 12 ಗಂಟೆಗಳನ್ನು ನಿಮ್ಮ ವೇಗವನ್ನು ಚುರುಕುಗೊಳಿಸಲು ಬಳಸಿ, ಹೊಸ ವಿಷಯಗಳನ್ನು ಕಲಿಯಲು ಹೋಗಬೇಡಿ. IT, HR, ಮಾರ್ಕೆಟಿಂಗ್ ಮತ್ತು ಅಗ್ರಿಕಲ್ಚರ್ ಅಭ್ಯರ್ಥಿಗಳು ಪಝಲ್, ಡೇಟಾ ಇಂಟರ್‌ಪ್ರಿಟೇಷನ್, ಅಂಕಗಣಿತ ಮತ್ತು ವ್ಯಾಕರಣದ ಅಭ್ಯಾಸ ಮಾಡಿ. ಲಾ ಮತ್ತು ರಾಜ್‌ಭಾಷಾ ವಿಭಾಗದವರು ಬ್ಯಾಂಕಿಂಗ್ ಅವೇರ್‌ನೆಸ್ ಹಾಗೂ ಓದುವ ವೇಗ ಹೆಚ್ಚಿಸಿಕೊಳ್ಳುವುದಕ್ಕೆ ಆದ್ಯತೆ ನೀಡಿ. ಒಂದು ಸಣ್ಣ ಮಾಕ್ ಟೆಸ್ಟ್ ಬರೆದು, ಅದರಲ್ಲಿ ಆಗುತ್ತಿರುವ ತಪ್ಪುಗಳು ಮತ್ತು ಸಮಯ ನಿರ್ವಹಣೆಯನ್ನು ಸರಿಯಾಗಿ ವಿಶ್ಲೇಷಿಸಿಕೊಳ್ಳಿ.

ವಿಭಾಗೀಯ ಸಮಯ (Sectional timing) ಇರುವುದರಿಂದ, ಪ್ರತಿಯೊಂದು ಸೆಕ್ಷನ್ ಅನ್ನು ಸೂಕ್ತವಾಗಿ ವಿಂಗಡಿಸಿಕೊಳ್ಳಿ. ಮೊದಲ 60 ನಿಮಿಷಗಳಲ್ಲಿ ಅತ್ಯಂತ ಸುಲಭವಾದ ಪ್ರಶ್ನೆಗಳನ್ನು ಬೇಗ ಮುಗಿಸಿ, ಆ ಬಳಿಕ ಸಾಧಾರಣ ಹಂತದ ಪ್ರಶ್ನೆಗಳನ್ನು ಬಿಡಿಸಿ. ನಿಮ್ಮ ಶಿಫ್ಟ್‌ಗೆ ತಕ್ಕಂತೆ ಆಹಾರ ಸೇವನೆ ಇರಲಿ. ಬೆಳಗಿನ ಶಿಫ್ಟ್ ಇದ್ದರೆ ಹಗುರವಾದ ಉಪಹಾರ ಸೇವಿಸಿ, ಮಧ್ಯಾಹ್ನದ ಶಿಫ್ಟ್‌ಗೆ ಭಾರಿ ಊಟ ತಪ್ಪಿಸಿ. ಪರೀಕ್ಷೆ ಮುಗಿದ ಮೇಲೆ ಸೀಲ್ ಮತ್ತು ಸಹಿ ಇರುವ ಕಾಲ್ ಲೆಟರ್ ಹಾಗು ಐಡಿ ಕಾಪಿಯನ್ನು ಕಾಯ್ದಿರಿಸಿಕೊಳ್ಳಿ. 2026ರ ನವೆಂಬರ್ 1ರಂದು ನಡೆಯಲಿರುವ ಮೇನ್ಸ್ ಪರೀಕ್ಷೆಗೆ ಇದು ಅಗತ್ಯವಿರುತ್ತದೆ. ಮುಂದಿನ ಅಪ್‌ಡೇಟ್‌ಗಳಿಗಾಗಿ IBPS ವೆಬ್‌ಸೈಟ್ ಚೆಕ್ ಮಾಡುತ್ತಿರಿ.