MHT CET 2026: ಸಿಎಪಿ ರೌಂಡ್ 4 ಆಪ್ಷನ್ ಎಂಟ್ರಿ ಆರಂಭ, ಕಾಲೇಜು ಸೀಟು ಪಡೆಯಲು ಇದುವೇ ಕೊನೆಯ ಅವಕಾಶ!

ಮಹಾರಾಷ್ಟ್ರದ ಎಂಜಿನಿಯರಿಂಗ್ ಕೌನ್ಸೆಲಿಂಗ್ ಪ್ರಕ್ರಿಯೆ ಈಗ ಅಂತಿಮ ಹಾಗೂ ಅತ್ಯಂತ ನಿರ್ಣಾಯಕ ಹಂತಕ್ಕೆ ತಲುಪಿದೆ. ಪ್ರಥಮ ವರ್ಷದ ಬಿ.ಇ/ಬಿ.ಟೆಕ್ ಪ್ರವೇಶಕ್ಕಾಗಿ 'ಸ್ಟೇಟ್ ಸಿಇಟಿ ಸೆಲ್' (State CET Cell) ಸಿಎಪಿ ರೌಂಡ್ 4 (CAP Round 4) ಆಪ್ಷನ್ ಎಂಟ್ರಿ ಪ್ರಕ್ರಿಯೆಯನ್ನು ಆಗಸ್ಟ್ 30 ರಿಂದ ಸೆಪ್ಟೆಂಬರ್ 1 ರವರೆಗೆ ಮುಕ್ತಗೊಳಿಸಿದೆ. ಅಧಿಕೃತ ಪೋರ್ಟಲ್‌ನಲ್ಲಿ ರೌಂಡ್ 4 ಆಪ್ಷನ್ ಸಬ್ಮಿಷನ್ ಮತ್ತು ಕನ್ಫರ್ಮೇಷನ್ ಲಿಂಕ್ ಸಕ್ರಿಯಗೊಂಡಿದೆ. ಕೊನೆ ಕ್ಷಣದ ಸರ್ವರ್ ಸಮಸ್ಯೆಯಿಂದ ತಪ್ಪಿಸಿಕೊಳ್ಳಲು ವಿದ್ಯಾರ್ಥಿಗಳು ಆದಷ್ಟು ಬೇಗ ತಮ್ಮ ಆಯ್ಕೆಗಳನ್ನು ಸಲ್ಲಿಸುವುದು ಒಳಿತು.

ಕಾಲೇಜು ಮತ್ತು ಸೀಟು ಉತ್ತಮಪಡಿಸಿಕೊಳ್ಳಲು (Betterment) ಈ ನಾಲ್ಕನೇ ರೌಂಡ್ ಕೊನೆಯ ಅವಕಾಶವಾಗಿದೆ. ಮಾಹಿತಿ ಕೈಪಿಡಿ ಪ್ರಕಾರ, "ರೌಂಡ್ 4ರ ನಂತರ ಯಾವುದೇ ಬೆಟರ್‌ಮೆಂಟ್ ಅವಕಾಶ ಇರುವುದಿಲ್ಲ. ಈ ಹಂತದಲ್ಲಿ ಹಂಚಕೆಯಾಗುವ ಅಥವಾ ಉಳಿಸಿಕೊಳ್ಳುವ ಸೀಟೇ ಅಂತಿಮವಾಗಿರುತ್ತದೆ". ಈಗಾಗಲೇ ಆಟೋ-ಫ್ರೀಜ್ (Auto-freeze) ಆಗಿರುವ ಅಭ್ಯರ್ಥಿಗಳು ಇದರಲ್ಲಿ ಭಾಗವಹಿಸಲು ಸಾಧ್ಯವಿಲ್ಲ. ಆದರೆ ಉಳಿದಂತೆ ಯಾರೆಲ್ಲಾ ಅರ್ಹರು ಎಂಬುದರ ವಿವರ ಇಲ್ಲಿದೆ ನೋಡಿ.

MHT CET 2026 ಸಿಎಪಿ ರೌಂಡ್ 4: ಮುಖ್ಯ ದಿನಾಂಕಗಳು ಮತ್ತು ವಿವರಗಳು

ಸಿಎಪಿ ರೌಂಡ್ 4 ರ ಆಪ್ಷನ್ ಫಾರ್ಮ್ ಭರ್ತಿ ಮಾಡಲು ಅಭ್ಯರ್ಥಿಗಳು ತಮ್ಮ ಲಾಗಿನ್ ಮೂಲಕ ಆಗಸ್ಟ್ 30 ರಿಂದ ಸೆಪ್ಟೆಂಬರ್ 1 ರವರೆಗೆ ಲಾಗ್ ಇನ್ ಆಗಬಹುದು. ಪೋರ್ಟಲ್‌ನಲ್ಲಿಯೂ ರೌಂಡ್ 4 ಆರಂಭವಾಗಿರುವ ಬಗ್ಗೆ ತಿಳಿಸಲಾಗಿದ್ದು, ಸೀಟು ಸುಧಾರಣೆಗೆ ಇದೇ ಅಂತಿಮ ಚಾನ್ಸ್ ಆಗಿದೆ. ಆಪ್ಷನ್ ಲಾಕ್ ಮಾಡಿದ ನಂತರದ ಪ್ರಕ್ರಿಯೆಗಳು ಮತ್ತು ಸೀಟು ಹಂಚಿಕೆ ಫಲಿತಾಂಶದ ವಿವರಗಳಿಗಾಗಿ ಅಧಿಕೃತ ವೆಬ್‌ಸೈಟ್‌ನ ವೇಳಾಪಟ್ಟಿಯನ್ನು ನಿಯಮಿತವಾಗಿ ಗಮನಿಸುತ್ತಿರಿ.

ಸಿಎಪಿ ರೌಂಡ್ 4 ರಲ್ಲಿ ಯಾರೆಲ್ಲಾ ಭಾಗವಹಿಸಬಹುದು?

ಇದುವರೆಗೆ ಯಾವುದೇ ಸೀಟು ಸಿಗದವರು, ಹಿಂದಿನ ರೌಂಡ್‌ಗಳಲ್ಲಿ ಆಪ್ಷನ್ ಫಾರ್ಮ್ ಭರ್ತಿ ಮಾಡದಿರುವವರು ಹಾಗೂ ರೌಂಡ್ 2 ರಲ್ಲಿ ಟಾಪ್ 3 ಅಥವಾ ರೌಂಡ್ 3 ರಲ್ಲಿ ಟಾಪ್ 6 ಗಿಂತ ಕೆಳಗಿನ ಆದ್ಯತೆಯ ಸೀಟು ಸಿಕ್ಕಿ, ಅದನ್ನು ಸ್ವೀಕರಿಸಿ ಈಗ ಮತ್ತಷ್ಟು ಉತ್ತಮ ಕಾಲೇಜು ನಿರೀಕ್ಷಿಸುತ್ತಿರುವವರು ಈ ಹಂತಕ್ಕೆ ಅರ್ಹರಾಗಿರುತ್ತಾರೆ. ಆದರೆ, ಹಿಂದಿನ ರೌಂಡ್‌ಗಳಲ್ಲಿ ಹೆಚ್ಚಿನ ಆದ್ಯತೆಯ ಸೀಟು ಸಿಕ್ಕು 'ಆಟೋ-ಫ್ರೀಜ್' ಆಗಿರುವ ವಿದ್ಯಾರ್ಥಿಗಳಿಗೆ ಈ ರೌಂಡ್‌ನಲ್ಲಿ ಅವಕಾಶವಿರುವುದಿಲ್ಲ.

ಆಪ್ಷನ್‌ಗಳನ್ನು ಭರ್ತಿ ಮಾಡುವುದು ಮತ್ತು ಲಾಕ್ ಮಾಡುವುದು ಹೇಗೆ?

ಮೊದಲು ಲಾಗಿನ್ ಆಗಿ ನಿಮ್ಮ ವಿವರಗಳನ್ನು ಪರಿಶೀಲಿಸಿ. ನಂತರ ನಿಮ್ಮ ಆದ್ಯತೆಗೆ ಅನುಗುಣವಾಗಿ ಕಾಲೇಜು ಮತ್ತು ಕೋರ್ಸ್‌ಗಳ ಆಯ್ಕೆಯನ್ನು ಸೇರಿಸಿ. ನೀವು ಗರಿಷ್ಠ 300 ಆಪ್ಷನ್‌ಗಳನ್ನು ಆಯ್ಕೆ ಮಾಡಬಹುದು. ಫಾರ್ಮ್ ಕನ್ಫರ್ಮ್ ಮಾಡಿದ ನಂತರ ಯಾವುದೇ ತಿದ್ದುಪಡಿಗೆ ಅವಕಾಶವಿರುವುದಿಲ್ಲ. ಆದ್ದರಿಂದ ಫಾರ್ಮ್ ಲಾಕ್ ಮಾಡುವ ಮುನ್ನ ವೆಬ್‌ಸೈಟ್‌ನಲ್ಲಿ ನೀಡಲಾಗಿರುವ ಯೂಸರ್ ಮ್ಯಾನ್ಯುವಲ್ ಹಾಗೂ ವೀಡಿಯೊ ಮಾರ್ಗದರ್ಶನವನ್ನು ಸರಿಯಾಗಿ ನೋಡಿಕೊಳ್ಳಿ.

ಖಾಲಿ ಸೀಟುಗಳು, ಕಟ್-ಆಫ್ ಮತ್ತು ಮೆರಿಟ್ ಲಿಸ್ಟ್ ಪರಿಶೀಲಿಸಿ

ಆಪ್ಷನ್ ಎಂಟ್ರಿಗೂ ಮುನ್ನ ಪೋರ್ಟಲ್‌ನಲ್ಲಿರುವ "Provisional Vacancy Position for CAP Round-IV" ಲಿಂಕ್ ಬಳಸಿ ಖಾಲಿ ಇರುವ ಸೀಟುಗಳನ್ನು ಪರಿಶೀಲಿಸಿ. ಮಹಾರಾಷ್ಟ್ರ ರಾಜ್ಯ ಮತ್ತು ಆಲ್ ಇಂಡಿಯಾ ಕೋಟಾದ ಸಿಎಪಿ ರೌಂಡ್ 3 ರ ಕಟ್-ಆಫ್‌ಗಳನ್ನು ಹೋಲಿಸಿ ನೋಡಿ. ಜೊತೆಗೆ ಮಹಾರಾಷ್ಟ್ರ ರಾಜ್ಯ ಮೆರಿಟ್ ಲಿಸ್ಟ್ ಮತ್ತು ಆಲ್ ಇಂಡಿಯಾ ಮೆರಿಟ್ ಲಿಸ್ಟ್ ಲಿಂಕ್‌ಗಳನ್ನು ಪರಿಶೀಲಿಸಿ, ನಿಮ್ಮ ವಿಭಾಗಕ್ಕೆ ಸರಿಯಾದ ಮಾಹಿತಿಯನ್ನೇ ಉಲ್ಲೇಖಿಸುತ್ತಿದ್ದೀರಾ ಎಂದು ಖಚಿತಪಡಿಸಿಕೊಳ್ಳಿ.

ಸೀಟು ಸ್ವೀಕಾರ, ವರದಿ, ನಿಯಮಗಳು ಮತ್ತು ಇನ್‌ಸ್ಟಿಟ್ಯೂಟ್ ಹಂತದ ಪ್ರವೇಶ

ಸೀಟು ಹಂಚಿಕೆಯಾದ ನಂತರ ಸೂಚನೆಗಳ ಪ್ರಕಾರ ಸೆಲ್ಫ್-ವೆರಿಫಿಕೇಶನ್ ಅಥವಾ ARC ಮೂಲಕ ಸೀಟನ್ನು ಕನ್ಫರ್ಮ್ ಮಾಡಿ. ಸೀಟು ಸ್ವೀಕಾರ ಶುಲ್ಕವು ಹಿಂತಿರುಗಿಸಲಾಗದ (non-refundable) ಪ್ರೊಸೆಸಿಂಗ್ ಫೀಸ್ ಆಗಿದೆ. ಸಮಯಕ್ಕೆ ಸರಿಯಾಗಿ ಸೀಟು ಸ್ವೀಕರಿಸದಿದ್ದರೆ ಅಥವಾ ಕಾಲೇಜಿಗೆ ರಿಪೋರ್ಟ್ ಮಾಡದಿದ್ದರೆ ಸೀಟು ರದ್ದಾಗುವುದಲ್ಲದೆ ಮುಂದಿನ ಹಂತಗಳಿಂದ ಹೊರಗುಳಿಯಬೇಕಾಗುತ್ತದೆ. ಇನ್‌ಸ್ಟಿಟ್ಯೂಟ್ ಹಂತದ ಆಪ್ಷನ್ ಫಾರ್ಮ್ ಆಗಸ್ಟ್ 3 ರಿಂದ ಸೆಪ್ಟೆಂಬರ್ 7 ರವರೆಗೆ ಲಭ್ಯವಿರುತ್ತದೆ. ಯಾವುದೇ ನೆರವಿಗಾಗಿ 18002098851 ಅಥವಾ +91-9175108612 ಗೆ ಕರೆ ಮಾಡಿ, ಇಲ್ಲವೇ ವಿದ್ಯಾರ್ಥಿ ನೆರವು ಕೇಂದ್ರಕ್ಕೆ (Student Assistance Centre) ಭೇಟಿ ನೀಡಿ.