UPSC ESE 2027: ಅರ್ಜಿ ಸಲ್ಲಿಕೆಗೆ ಇನ್ನು ಕೆಲವೇ ಗಂಟೆ ಬಾಕಿ! ತಡಮಾಡಿದರೆ ಅವಕಾಶ ಕೈತಪ್ಪೀತು, ಕೂಡಲೇ ಹೀಗೆ ಮಾಡಿ

ಕೇಂದ್ರ ಲೋಕಸೇವಾ ಆಯೋಗವು (UPSC) ಇಂಜಿನಿಯರಿಂಗ್ ಸೇವೆಗಳ ಪರೀಕ್ಷೆ (ESE) 2027 ರ ಅರ್ಜಿ ಸಲ್ಲಿಕೆಗೆ ಅಕ್ಟೋಬರ್ 6, 2026 ರ ಸಂಜೆ 6 ಗಂಟೆಯನ್ನು ಅಂತಿಮ ಗಡುವು ಎಂದು ನಿಗದಿಪಡಿಸಿದೆ. ನಿಗದಿತ ಸಮಯ ಮುಗಿಯುತ್ತಿದ್ದಂತೆ ಅರ್ಜಿ ಸಲ್ಲಿಸುವ ಪೋರ್ಟಲ್ ಬಂದ್‌ ಆಗಲಿದ್ದು, ದಿನಾಂಕ ವಿಸ್ತರಿಸುವ ಯಾವುದೇ ಸಾಧ್ಯತೆಗಳಿಲ್ಲ. ಪ್ರಿಲಿಮ್ಸ್ ಪರೀಕ್ಷೆಯು 2027 ರ ಜನವರಿ 31 ರಂದು ನಡೆಯಲಿದೆ. ಕೊನೆ ಕ್ಷಣದ ಸರ್ವರ್ ಸಮಸ್ಯೆ ಹಾಗೂ ಪಾವತಿ ವಿಳಂಬವನ್ನು ತಪ್ಪಿಸಲು ಅಭ್ಯರ್ಥಿಗಳು ಮುಂಚಿತವಾಗಿಯೇ ಅರ್ಜಿ ಸಲ್ಲಿಸುವುದು ಸೂಕ್ತ.

ಈ ಬಾರಿಯ ಪರೀಕ್ಷಾ ಪ್ರಕ್ರಿಯೆಯಲ್ಲಿ ಯುನಿವರ್ಸಲ್ ರಿಜಿಸ್ಟ್ರೇಷನ್ ನಂಬರ್ (URN), ಕಾಮನ್ ಅಪ್ಲಿಕೇಷನ್ ಫಾರ್ಮ್ (CAF), ಲೈವ್ ಫೋಟೋ ಕ್ಯಾಪ್ಚರ್ ಮತ್ತು ಮೂರು ಸಹಿಗಳ ಅಪ್‌ಲೋಡ್‌ನಂತಹ ಹೊಸ ನಿಯಮಗಳನ್ನು ಕಡ್ಡಾಯಗೊಳಿಸಲಾಗಿದೆ. ಜೊತೆಗೆ ಪರೀಕ್ಷಾ ಕೇಂದ್ರದಲ್ಲಿ 'ಫೇಸ್ ಅಥೆಂಟಿಕೇಶನ್' (ಮುಖ ಗುರುತಿಸುವಿಕೆ) ಪ್ರಕ್ರಿಯೆ ಇರಲಿದ್ದು, ಬಿಗಿ ತಪಾಸಣೆ ನಡೆಯಲಿದೆ. ಅರ್ಜಿ ಸಲ್ಲಿಕೆಯ ತಾಂತ್ರಿಕ ಸಮಸ್ಯೆಗಳ ಪರಿಹಾರಕ್ಕಾಗಿ ಪ್ರತ್ಯೇಕ ಹೆಲ್ಪ್‌ಲೈನ್ ವ್ಯವಸ್ಥೆಯನ್ನು ಸಹ ಕಲ್ಪಿಸಲಾಗಿದೆ.

UPSC ESE 2027: ಅರ್ಜಿ ಸಲ್ಲಿಕೆಯ ಡೆಡ್‌ಲೈನ್ ಮತ್ತು ಪ್ರಮುಖ ದಿನಾಂಕಗಳು

ಅರ್ಜಿ ಸಲ್ಲಿಕೆ ಪ್ರಕ್ರಿಯೆಯು ಸೆಪ್ಟೆಂಬರ್ 16, 2026 ರಂದು ಪ್ರಾರಂಭವಾಗಿದ್ದು, ಅಕ್ಟೋಬರ್ 6, 2026 ರ ಸಂಜೆ 6 ಗಂಟೆಗೆ ಮುಕ್ತಾಯಗೊಳ್ಳಲಿದೆ. ಒಮ್ಮೆ ಅರ್ಜಿ ಸಲ್ಲಿಸಿದ ನಂತರ ಅದನ್ನು ಹಿಂಪಡೆಯಲು ಅಥವಾ ತಿದ್ದುಪಡಿ ಮಾಡಲು ಅವಕಾಶವಿರುವುದಿಲ್ಲ. ಆದ್ದರಿಂದ ಅರ್ಜಿ ಸಲ್ಲಿಸುವ ಮುನ್ನ ಪ್ರತಿಯೊಂದು ಮಾಹಿತಿಯನ್ನು ಸರಿಯಾಗಿ ಪರಿಶೀಲಿಸಿ. ಪರೀಕ್ಷೆಗೆ ಒಂದು ವಾರ ಮುಂಚಿತವಾಗಿ ಇ-ಅಡ್ಮಿಟ್ ಕಾರ್ಡ್ ಬಿಡುಗಡೆಯಾಗಲಿದೆ. ಪ್ರಿಲಿಮ್ಸ್ ಪರೀಕ್ಷೆ 2027 ರ ಜನವರಿ 31 ರಂದು ಹಾಗೂ ಮೇನ್ಸ್ ಪರೀಕ್ಷೆ 2027 ರ ಜೂನ್ 18 ರಂದು ನಡೆಯಲಿದೆ.

UPSC ESE 2027: ಅರ್ಹತೆ ಮತ್ತು ಮೀಸಲಾತಿ ಪ್ರಮಾಣಪತ್ರಗಳ ವಿವರ

ಮೀಸಲಾತಿ ಸೌಲಭ್ಯ ಪಡೆಯಲು ನಿಗದಿತ ನಮೂನೆಯಲ್ಲಿಯೇ ಸೂಕ್ತ ಪ್ರಮಾಣಪತ್ರಗಳನ್ನು ಸಲ್ಲಿಸುವುದು ಕಡ್ಡಾಯ. ಆರ್ಥಿಕವಾಗಿ ಹಿಂದುಳಿದ ವರ್ಗದ (EWS) ಪ್ರಮಾಣಪತ್ರವು 2025–26 ಆರ್ಥಿಕ ವರ್ಷದ ಆದಾಯವನ್ನು ಆಧರಿಸಿರಬೇಕು ಹಾಗೂ ಇದನ್ನು ಏಪ್ರಿಲ್ 1, 2026 ರಂದು ಅಥವಾ ನಂತರ ಪಡೆದಿರಬೇಕು. ಇನ್ನು ಇತರ ಹಿಂದುಳಿದ ವರ್ಗಗಳ (OBC Non‑Creamy Layer) ಪ್ರಮಾಣಪತ್ರವು 2023–24, 2024–25 ಮತ್ತು 2025–26 ಆರ್ಥಿಕ ವರ್ಷಗಳ ಉಲ್ಲೇಖ ಹೊಂದಿರಬೇಕು ಹಾಗೂ ಏಪ್ರಿಲ್ 1, 2026 ರ ನಂತರ ವಿತರಿಸಲ್ಪಟ್ಟಿರಬೇಕು. PwBD ಅಭ್ಯರ್ಥಿಗಳು ಆನೆಕ್ಸರ್-III ನಮೂನೆಯಲ್ಲಿ ಪ್ರಮಾಣಪತ್ರ ಸಲ್ಲಿಸಬೇಕಾಗುತ್ತದೆ.

ಅರ್ಜಿ ಸಲ್ಲಿಸುವುದು ಹೇಗೆ? URN ನಿಂದ CAF ವರೆಗೆ ಸುಲಭ ಹಂತಗಳು

ಮೊದಲು ಖಾತೆ ತೆರೆದು ನಿಮ್ಮ ಯುನಿವರ್ಸಲ್ ರಿಜಿಸ್ಟ್ರೇಷನ್ ನಂಬರ್ (URN) ಪೂರ್ಣಗೊಳಿಸಿ ಲಾಕ್ ಮಾಡಿ. ನಂತರ ಅಗತ್ಯ ದಾಖಲೆಗಳೊಂದಿಗೆ ಕಾಮನ್ ಅಪ್ಲಿಕೇಷನ್ ಫಾರ್ಮ್ (CAF) ಭರ್ತಿ ಮಾಡಿ, ಪರೀಕ್ಷಾ ಕೇಂದ್ರ ಮತ್ತು ಶುಲ್ಕ ಪಾವತಿಗಾಗಿ 'ಎಕ್ಸಾಮ್ ಸ್ಪೆಸಿಫಿಕ್ ಮಾಡ್ಯೂಲ್'ಗೆ ತೆರಳಿ. ಭವಿಷ್ಯದ ವ್ಯವಹಾಗಳಿಗಾಗಿ URN ಮತ್ತು ಆಟೋ-ಜನರೇಟ್ ಆದ ಅಪ್ಲಿಕೇಶನ್ ನಂಬರ್ ಎರಡನ್ನೂ ಕಾಯ್ದಿರಿಸಿಕೊಳ್ಳಿ. ಪರಿಶೀಲನೆ ಸುಲಭವಾಗಲು ಆಧಾರ್ ಕಾರ್ಡ್ ಬಳಸುವುದು ಒಳಿತು.

ಫೋಟೋ, ತ್ರಿಪಲ್ ಸಿಗ್ನೇಚರ್ ಮತ್ತು ಶುಲ್ಕ ಪಾವತಿಯ ಚೆಕ್‌ಲಿಸ್ಟ್

CAF ಭರ್ತಿ ಮಾಡುವಾಗ ಇತ್ತೀಚಿನ ಫೋಟೋ ಜೊತೆಗೆ ಲೈವ್ ಫೋಟೋ ಕ್ಯಾಪ್ಚರ್ ಪೂರ್ಣಗೊಳಿಸಬೇಕು. ಬಿಳಿ ಹಾಳೆಯ ಮೇಲೆ ಕಪ್ಪು ಶಾಯಿಯ ಪೆನ್ನಿನಿಂದ ಮೂರು ಬಾರಿ ಸಹಿ ಮಾಡಿ, ಅದನ್ನು ಒಂದೇ ಸ್ಪಷ್ಟ ಚಿತ್ರವಾಗಿ ಅಪ್‌ಲೋಡ್ ಮಾಡಬೇಕು. ಅರ್ಜಿ ಶುಲ್ಕ 200 ರೂ. ಆಗಿದ್ದು, ನೆಟ್ ಬ್ಯಾಂಕಿಂಗ್, ಕಾರ್ಡ್‌ಗಳು ಅಥವಾ UPI ಮೂಲಕ ಪಾವತಿಸಬಹುದು (ಶುಲ್ಕ ಮರುಪಾವತಿ ಇರುವುದಿಲ್ಲ). ಮಹಿಳೆಯರು, SC, ST ಮತ್ತು PwBD ಅಭ್ಯರ್ಥಿಗಳಿಗೆ ಶುಲ್ಕ ವಿನಾಯಿತಿ ಇದೆ; OBC ಮತ್ತು EWS ಅಭ್ಯರ್ಥಿಗಳು ಶುಲ್ಕ ಪಾವತಿಸುವುದು ಕಡ್ಡಾಯ. ಹೆಲ್ಪ್‌ಲೈನ್ ಸಂಖ್ಯೆಗಳು: 011‑24041001, 011‑40303444 (ಬೆಳಿಗ್ಗೆ 10 ರಿಂದ ಸಂಜೆ 5:30 ರವರೆಗೆ ಲಭ್ಯ).