ದಿನಕ್ಕೆ ಒಂಬತ್ತು ಗಂಟೆ ನಿದ್ರೆ ಮಾಡಿ...ನೂರು ದಿನಕ್ಕೆ ಒಂದು ಲಕ್ಷ ರೂ ವೇತನ ಪಡೆಯಿರಿ

ನಿದ್ದೆ ಅಂದ್ರೆ ಯಾರಿಗ್ ಇಷ್ಟ ಆಗಲ್ಲ ಹೇಳಿ. ಸದಾ ನಿದ್ದೆ ಮಾಡೋ ಕಾಯಕ ಮಾಡಿ ಅಂದ್ರೆ ನಾ ಮುಂದು ತಾ ಮುಂದು ಅಂತ ಎಲ್ಲರೂ ಸಿದ್ಧ. ಈ ನಿದ್ದೆನೇ ನಿಮ್ ಕಾಯಕ ಆದ್ರೆ ಎಷ್ಟು ಚೆನ್ನಾಗಿ ಇರತ್ತೆ ಅಲ್ವಾ!. ನಿದ್ದೆಯನ್ನು ಕಾಯಕ ಆಗಿ ಮಾಡ್ಕೊಬಹುದಾ? ಅದಕ್ಕೂ ಸಂಬಳ ಸಿಗುತ್ತಾ? ಅನ್ನೋದಕ್ಕೆ ಇಲ್ಲಿದೆ ಉತ್ತರ.

ಭಾರತದ ಸ್ಟಾರ್ಟ್-ಅಪ್ ಕಂಪೆನಿಯೊಂದು ನಿದ್ರಾ ಪ್ರಿಯರಿಗೆ ಇಂಟರ್ನ್‌ಶಿಪ್ ಒದಗಿಸಲು ಮತ್ತು 1 ಲಕ್ಷ ರೂಗಳ ವೇತನ ನೀಡಲು ಮುಂದಾಗಿದೆ. ಇದರ ಬಗ್ಗೆ ಹೆಚ್ಚಿನ ಮಾಹಿತಿಯನ್ನು ತಿಳಿಯಲು ಮುಂದೆ ಓದಿ.

ಸ್ಲೀಪ್ ಸಲ್ಯೂಷನ್ಸ್ ಸ್ಟಾರ್ಟ್-ಅಪ್ ವೇಕ್ ಫಿಟ್ ಸಂಸ್ಥೆಯು "ಸ್ಲೀಪ್ ಇಂಟರ್ನ್‌ಶಿಪ್ 2020"ರ ಬ್ಯಾಚ್‌ಗಾಗಿ ಅಭ್ಯರ್ಥಿಗಳನ್ನು ಹುಡುಕುತ್ತಿದೆ. ಆಸಕ್ತ ಅಭ್ಯರ್ಥಿಗಳು ಅರ್ಜಿಯನ್ನು ಸಲ್ಲಿಸಬಹುದು.

ಸಂಸ್ಥೆಯು ತನ್ನ ಅಧಿಕೃತ ವೆಬ್‌ಸೈಟ್‌ನಲ್ಲಿ ಈ ಆಫರ್ ಬಗೆಗೆ ಪೋಸ್ಟ್ ಮಾಡಿದೆ. ಈ ಇಂಟರ್ನ್‌ಶಿಪ್ ಗೆ ಸೇರ ಬಯಸುವ ಅಭ್ಯರ್ಥಿಗಳು ನಿದ್ದೆ ಮಾಡಲು ಇಚ್ಛೆ ಉಳ್ಳವರಾಗಿರಬೇಕು ಮತ್ತು ಅತೀ ಕಡಿಮೆ ಅವಧಿಯಲ್ಲಿ ನಿದ್ರೆಗೆ ಜಾರುವ ಸಾಮರ್ಥ್ಯವನ್ನು ಹೊಂದಿರಬೇಕು. ಅಷ್ಟೇ ಅಲ್ಲದೆ ಈ ಉದ್ಯೋಗಕ್ಕೆ ಸೇರುವ ಅಭ್ಯರ್ಥಿಗಳು ಪೈಜಾಮ ವಸ್ತ್ರವನ್ನು ಧರಿಸಬೇಕಿರುತ್ತದೆ.

ಈ ಸಂಸ್ಥೆಯಲ್ಲಿ ಕೆಲಸಕ್ಕೆ ಸೇರಿದ ಅಭ್ಯರ್ಥಿಗಳು ಪ್ರತಿ ರಾತ್ರಿ ಒಂಬತ್ತು ಗಂಟೆ ಅವಧಿ ನಿದ್ದೆ ಮಾಡಬೇಕಿರುತ್ತದೆ. ಒಟ್ಟಾರೆ ನೂರು ದಿನಗಳ ಕಾಲ ಹೀಗೆ ಮಾಡಿದರೆ ಸಾಕು 1 ಲಕ್ಷ ರೂಗಳ ಸ್ಟೈಫೆಂಡ್ ಅನ್ನು ಪಡೆಯಬಹುದು.

ಯಾಕೆ ಈ ರೀತಿಯ ಉದ್ಯೋಗ ಸೃಷ್ಟಿಸುತ್ತಿದೆ ಎಂದರೆ ಅಭ್ಯರ್ಥಿಗಳು ಸಂಸ್ಥೆಯ ಮ್ಯಾಟ್ರೆಸ್ ಬಳಸಿ ನಿದ್ದೆ ಮಾಡುವ ರೀತಿಯನ್ನು ಅಧ್ಯಯನ ಮಾಡುವ ಉದ್ದೇಶವನ್ನು ಒಳಗೊಂಡಿರುತ್ತದೆ ಹಾಗಾಗಿ ಸಂಸ್ಥೆಯು ಅಭ್ಯರ್ಥಿಯ ನಿದ್ರಾ ಶೈಲಿ ಬಗ್ಗೆ ತಿಳಿಯಲು ಸ್ಲೀಪ್ ಟ್ರಾಕರ್ ಒದಗಿಸಲಿದೆಯಂತೆ.