ಎಸ್‌ಎಸ್‌ಎಲ್‌ಸಿ ನಂತರದ ಕಾಲೇಜು ಆಯ್ಕೆ ಮಾಡುವ ಮುನ್ನ ಈ ಅಂಶಗಳು ನೆನಪಿರಲಿ

ಖಾಸಗಿ ಅಥವಾ ಸರ್ಕಾರಿ ಕಾಲೇಜುಗಳ ಆಯ್ಕೆ :

ವಿದ್ಯಾರ್ಥಿಯು ತನ್ನ ಅರ್ಹತೆಗಳ ಮತ್ತು ವೈಯಕ್ತಿಕ ಇಚ್ಚೆಗಳಿಗೆ ತಕ್ಕಂತೆ ಖಾಸಗಿ ಅಥವಾ ಸರ್ಕಾರಿ ಕಾಲೇಜುಗಳನ್ನು ಆಯ್ಕೆ ಮಾಡಿಕೊಳ್ಳಬಹುದು. ಇಲ್ಲಿ ಯಾವುದೇ ರೀತಿಯ ನಕಾರಾತ್ಮಕ ಆಲೋಚನೆಗಳು ಬೇಡ, ಪೋಷಕರ ಹಣಕಾಸು ಪರಿಸ್ಥಿತಿಯನ್ನು ಗಮನದಲ್ಲಿಟ್ಟುಕೊಂಡು ಉತ್ತಮ ಕಾಲೇಜು ಮತ್ತು ಸೂಕ್ತ ವಿಷಯಗಳನ್ನು ಆಯ್ಕೆ ಮಾಡಿ.

ಕಾಲೇಜು ವಾತಾವರಣ :

ಓದುವ ವಿದ್ಯಾರ್ಥಿ ಎಲ್ಲಿದ್ದರೂ ಓದುತ್ತಾನೆ ಎನ್ನುವುದು ಸತ್ಯ ಆದರೆ ಓದುವ ಮನಸ್ಸಿಗೆ ವಾತಾವರಣ ಪೂರಕವಾಗಿರಬೇಕು ಎಂಬುದೂ ಅಷ್ಟೇ ಸತ್ಯ. ಹಾಗಾಗಿ ವಿದ್ಯಾರ್ಥಿಯು ಬೆಳೆದು ಬಂದ ವಾತಾವರಣಕ್ಕೆ ಪೂರಕವಾಗಿ ಕಾಲೇಜು ವಾತಾವರಣ ಸೂಕ್ತವಾಗಿದೆಯೇ ? ಮತ್ತು ನಿಮ್ಮ ಮಗು ಆ ವಾತಾವರಣಕ್ಕೆ ಹೊಂದಿಕೊಳ್ಳುತ್ತದೆಯೇ ಎಂದು ಅವಲೋಕಿಸಿ ನಂತರ ಆಯ್ಕೆ ಮಾಡಿ.

 

ಅಗತ್ಯ ಸೌಲಭ್ಯಗಳು :

ವಿದ್ಯಾರ್ಥಿಯು ತನ್ನ ಓದಿಗೆ ಅಗತ್ಯವಾದ ಸೌಕರ್ಯಗಳು ಕಾಲೇಜಿನಲ್ಲಿ ಲಭ್ಯವಿದೆಯೇ ಎಂದು ಸ್ಪಷ್ಟಪಡಿಸಿಕೊಳ್ಳಿ. ಉದಾಹರಣೆಗೆ ವಿಜ್ಞಾನ ಪ್ರಯೋಗಾಲಯಗಳು, ಗ್ರಂಥಾಲಯಗಳು, ಸಿಬ್ಬಂದಿ ಮತ್ತು ಇತರೆ ಸೌಲಭ್ಯಗಳಿವೆ ಎಂಬುದನ್ನು ತಿಳಿದುಕೊಳ್ಳಿ. ನಂತರ ನಿಮ್ಮ ವೈಯಕ್ತಿಕ ಆಸಕ್ತಿಗಳ ಅನುಸಾರ ನಿರ್ಧಾರಗಳನ್ನು ತೆಗೆದುಕೊಳ್ಳಿ.

ಪ್ರಯಾಣ ವ್ಯವಸ್ಥೆ :

ಒಮ್ಮೆ ಕಾಲೇಜು ಆಯ್ಕೆ ಮಾಡುವಾಗ ಅನೇಕ ಅಂಶಗಳಲ್ಲಿ ಈ ಪ್ರಯಾಣ ವ್ಯವಸ್ಥೆ ಕೂಡ ಅಷ್ಟೇ ಮುಖ್ಯವಾಗಿರುತ್ತದೆ. ಮನೆಯಿಂದ ಕಾಲೇಜಿಗೆ ತಲುಪಿಗೆ ಸಮಯ ಮತ್ತು ಅಂತರ ಎಷ್ಟಿದೆ ? ಅದಕ್ಕೆ ಸೂಕ್ತ ವ್ಯವಸ್ಥೆ ಏನಿದೆ ಎಂಬುದನ್ನು ತಿಳಿಯಿರಿ. ಪ್ರಯಾಣ ಬೆಳೆಸುವ ಸಮಯ ಕಡಿಮೆ ಇದ್ದಲ್ಲಿ ಉತ್ತಮ ದಿನನಿತ್ಯದ ಚಟುವಟಿಕೆಗಳನ್ನು ನಿಭಾಯಿಸಲು ಸಾಧ್ಯವಾಗುತ್ತದೆ. ಇಲ್ಲವಾದಲ್ಲಿ ವಿದ್ಯಾರ್ಥಿಗಳು ಅನೇಕ ಸಮಸ್ಯೆಗಳನ್ನು ಎದುರಿಸಬೇಕಾದೀತು.

ಕೋಚಿಂಗ್ ಸೌಲಭ್ಯಗಳು :

ವಿದ್ಯಾರ್ಥಿಗಳು ಜೀವನದ ಬಹುದೊಡ್ಡ ಗುರಿಗಳನ್ನು ತಲುಪಲು ಈ ಸ್ಪರ್ಧಾತ್ಮಕ ಪರೀಕ್ಷೆಗಳು ಪ್ರಮುಖ ಪಾತ್ರವಹಿಸುತ್ತವೆ. ಹಾಗಾಗಿ ವಿದ್ಯಾರ್ಥಿಗಳು ತಮ್ಮ ಕಾಲೇಜು ಹಂತದಿಂದಲೇ ವಿವಿಧ ಪರೀಕ್ಷೆಗಳಿಗೆ ಸಿದ್ಧತೆಯನ್ನು ನಡೆಸಲು ಪ್ರಾರಂಭಿಸುತ್ತಾರೆ. ಕಾಲೇಜುಗಳಲ್ಲಿ ವಿದ್ಯಾರ್ಥಿಗೆ ಬೇಕಾದ ಕೋಚಿಂಗ್ ಸೌಲಭ್ಯವಿದೆಯೇ ಅಥವಾ ಇಲ್ಲವಾದಲ್ಲಿ ಬೇರೆ ಪರ್ಯಾಯ ಮಾರ್ಗ ಏನಿದೆ ಎನ್ನುವುದನ್ನು ಕಂಡುಕೊಳ್ಳಿ.